280 ka balay gilamoy sa sunog

CEBU, Philippines – Gibanabanang mokabat sa P2.8 milyones ang danyos sa naugdaw’ng 280 kapin ka panimalay sa nahitabong sunog sa sitio Limonsito ug sitio Mango sa barangay Umapad dakbayan sa Mandaue sa milabay’ng gabii.

Sa imbestigasyon ni FO3 Cepriano Codilla Jr. sa kabomberohan sa dakbayan sa Mandaue, ang sunog nagsugod sa panimalay ni Bonifacio Llanto.

Nadawat sa kabomberohan ang alarma sa sunog alas 11:15 sa milabay’ng gabii ug giisa kini dayon ngadto sa general alarm ug nakontrolar sulod sa 45 minutos.

Sumala pa sa mga saksi nga sila si Gregie Liquigan ug Jessie Sure usa ka wire ang mi-spark ug mikatap dayon ang sunog sa panimalay ni Llanto nga ginama sa light materials (amakan).

Matud pa ni FO3 Codilla, gumikan sa kasikit-sikit sa mga panimalay nga mga gama sa light materials ug ang kusog nga huyohoy sa hangin daling mikatap ang kalayo.

Samtang naglisod ang mga bombero tungod sa kahuot sa dalan ug kakulang sa tubig maong dugay nilang napalong ang kalayo, napugos sila pagsumpay-sumpay sa mga fire hoses aron maabot sa kabalayan sa sulod.

Ang mga nasunugan misaway sa kabomberohan sa dakbayan sa Mandaue tungod sa kalangay nila pag-abot sa sentro sa sunog hangtud nalang nga giisa na ngadto sa general alarm.

Usa ka Evelyn del Leonardo, residente sa maong dapit mitug-an nga 300 metros pa ang gilay-on sa sunog gikan sa ilang panimalay dihang iyahang gihangyo ang mga bombero nga pasudlon sa dakong hawanan ug basketball court sa ilang dapit apan giingong nagdumili ang mga bombero.

Mipasangil usab silang ang ubang fire trucks nga miresponde walay sulod nga tubig sa ilang mga tanke.

Apan ang mga alegasyon sa mga residente gipanghimakak ni FO3 Codilla ug mibasol hinuon sa kahuot sa agianan sa lugar nga dunay daghang mga publikong ug pribadong sakyanan nga nangatanggong.

Samtang gipangita pa sa kabomberuhan ang tagbalay diin magsugod ang sunog aron makuhaan og pamahayag kabahin sa nahitabo. – BANAT NEWS