Mahuyang nga giluglog patay wa gyud ilhi

CEBU, Philippines - Nagpaabot ang kapolisan sa dakbayan sa Lapulapu nga mopatim-aw ang kabanay sa usa ka mahuyang nga gituohang gitulis ug gigulgol ang liog patay sulod sa usa ka motel sa Marigondon, dakbayan sa Lapulapu sa miaging kaadlawon.

Kini samtang sa pagsuwat ning balita nagpabiling wala pa hiilhi ang biktima kinsa gihaya karon sa Cosmopolitan Funeral Homes sa dalan Punta Rizal sa barangay Pajo, sa maong dakbayan.

Si SPO3 Rex Ybañez sa homicide section sa Lapulapu City Police Station nagkanayon nga wala sila’y napalgang mga ebedensya sulod sa lawak sa Hawaian Village motel diin patya ang biktima.

Ang patay’ng lawas sa biktima nga hubo, napalgang nagbuy-od sa sawog kansang liog giluglog sa mahait nga hinagiban ug gani hapit kini maputol nga maoy nakaingon sa hinanali niining kamatayon.

Si Ybanez miingon nga ang gitas-on sa pamarog sa biktima ilang gibanabana nga anaa sa 5’5” , kasarangan ang gidak-on sa panglawas ug anaa sa 30 kapin ang iyang panuigon.

Sa pasiunang pakisusi, gituohan nga duha ka mga hinungdan ang mahimong nagpaluyo sa maong pagpatay, nga mahimong gitulis kini o kaha usa ka call boy ang gikakuyog diin gumikan sa wala magkasinabot sa bayad, maoy hinungdan nga gipatay ang biktima. - Romeo T. Limpangog (BANAT NEWS)