CEBU, Philippines - Usa ka lalaking nagsaulog sa iyang birthday ang nalumos ug napalgan sa iyang mga igsuon ug mga higala nga wala nay kinabuhi samtang nangaligo kagahapon pasado alas 12 sa udto sa Larawan Beach Resort.
Si Antonio Carampatan, 45, taga dalan Molave, Tabunok syudad sa Talisay kansang adlaw’ng natawhan niadtong Sabado apan kagahapon ra nila i-selebrar pinaagi sa pangaligo sa dagat napalgan nalang nga patay na.
Matud pa ni PO1 Julio Cañolas Jr. sa pakighinabi sa Banat News walay nakabantay kang Carampatan nga naligo niadtong higayuna tungod kay nag-inom ang mga igsuon ug mga higala niini.
Giingong hubog na niadtong higayuna si Carampatan apan naligo gyud kini sa dagat, gituohan sa mga kabanay nga nabikugan kini ug wala na makalangoy pa hangtod nga nalumos.
Ilaha nalang nabantayan nga naglutaw na kini hinungdan nga gidali nila pagtabang ug gidala sa Talisay City District Hospital apan gideklarar kini nga dead on arrival. - Lesley Caminade (BANAT NEWS)