Class suit ipasaka ni Garganera batok siyudad ug towing companies

CEBU, Philippines - Naglaraw si kanhi Tinago Barangay kapitan ug karon barangay kagawad Joel Garganera pagpasaka og class suit ug injunction ngadto sa korte batok sa duha ka towing companies, Mayor Tomas Osmeña ug ubang mga opisyales sa siyudad.

 Kini human namatud-i nga wala diay napirmahang kontrata ang siyudad sa Sugbu sa Road Warrior Towing Services ug One Stop Towing Services aron maoy mopahigayon og towing operation dinhi.

 Sa pagpakighinabi ni Garganera sa DyRF, iyang gihulagway nga ilegal ang paghatag ni Osmeña og authorization sa duha ka towing companies lakip na towing operation ug labaw sa tanan ang towing collection nga pwerteng mahala.

Matud pa niini walay ordinansang napasar ang konseho sa siyudad nga sigon sa balaud nga maoy gibasehan sa pag-isyu og authorization, wala gipahigayon og bidding.

 Dugang pa ni Garganera nga suod nga higala ug supporter ni Osmeña si Vincent Go, ang tinuoray nga tag-iya sa Road Warriors ug dili ang usa ka Pagador, samtang si Art Osmeña nga tag-iya sa One Stop Towing Services nga mao usab ang tag-iya sa Citilink Terminal ug ang terminal sa may White Gold.

Matud pa ni Garganera nga may tulobagon usab ang mayor sa pagpirma niini sa usa ka tuig nga authorization sa One Stop Towing Services gikan sa bulan sa Enero ngadto na sa bulan sa Disyembre sa tuig 2008 tungod kay sigon sa record sa BIR iyang nahibaw-an nga sa September 8, 2008 pa nagsugod og operate ang One Stop Towing Services.

 Tungod niini, si Garganera nagplanong mopasaka og class suit ingon man injunction batok sa duha ka towing companies ug mga opisyales sa dakbayan.

Giawhag ni Garganera ang tanang mga nabiktima sa towing operation sa duha ka towing companies nga makig-alayon kaniya alang sa hingpit nga pagpasaka sa kaso. - Chester Abadilla (BANAT NEWS)