CEBU, Philippines - Ilhon unya sa kagamhanan sa dakbayan sa Sugbu ang “Pound for pound King” nga si Manny “Pacman” Pacquiao isip Tourism Ambassador sa dakbayan.
Kini maoy gibutyag ni Konsehal Raul “Yayoy” Alcoseba nga maoy gitahasan sa pagpreparar alang sa pagbisita sa Pinoy boxing superstar dinhi sa siyudad.
Matud pa sa konsehal nga ang pag-ila himuon pinaagi sa pagtunol og plaque ngadto sa People’s Champ nga gitawag usab og Pambansang Kamao atol sa gitakdang pagduaw niini sa dakbayan karong Miyerkules subay usab sa pag-imbitar sa city government niini.
Nagkanayon si Alcoseba nga tukma ang paghimong tourism ambassador kang Pacquiao tungod kay ilado na kini tibuok kalibutan.
“Kay one of the biggest attraction sa Philippines now is Manny Pacquiao, mao na nga nailhan ta og samot all over the world tungod ni Manny,” sumala ni Alcoseba.
Ang labing awahing kalampusan ni Pacman mao ang iyang pagpalukapa sa Briton nga si Ricky “The Hitman” Hatton uban sa pag-ilog sa IBO light-welterweight belt niini.
Dunay motorkadang himuon gikan sa tugpahanan sa Mactan nga moagi sa siyudad sa Mandaue lahos sa Basilica del Santo Niño.Human unya makayukbo ang pinoy boxing superstar sa Balaang Bata kini giingong maglakaw na lang kini paingon sa Plaza Sugbu diin usa ka programa ang himuon. Si Mayor Tomas Osmeña nga mahiabot usab sa dakbayan ugmang adlawa gikan sa Estados Unidos giingong mao unya’y musugat sa People’s Champ. - Elly Bolonos (BANAT NEWS)