Mireklamong tinun-an nakapaso na

CEBU, Philippines – Natubag na ang petisyong gipangayo sa mga tinun-an sa  Divine Mercy Computer College nga miduol sa Commission on Higher Education (Ched-7) nga makapaso human nila makumpleto ang ilang kurso ug gitugutang makapaso niadtong Mayo 17.

Ang maong mga tinun-an una nang misang-at og petisyon ngadto sa buhatan sa CHED-7 ug mireklamo batok sa bise presidente sa maong tunghaan gumikan kay wala sila makapaso bisan paman natapos na ang ilang kurso. Giingong ang gihimong rason sa kadagkuan sa maong tunghaan mao ang kapakyas nila pagkumpleto sa rekisitos partikular na ang ilang pagdepensa sa ilang thesis.

Apan usa sa mga tinun-ang mireklamo (mihangyo di magpahingalan) nga natugutang makapaso niadtong Mayor 17 mitug-an sa Banat News nga silang mga mipetisyon nakakumpleto na sa maong rekisitos pipila ka adlaw human sa ilang pagsang-at sa petisyon.

Giingong dunay representante ang CHED-7 ug ang tunghaan dihang ilang gihimo ang final defense sa ilang thesis. Siya nagkanayon nga  niadtong Mayo 14, nag-abot silang mga 18 ka mga reklamante ug duha ka mga maestra sa tunghaan diha sa buhatan ni CHED -7 OIC regional director Candelario Aytona aron tukion ang problema.

Atol sa maong tigum, si Aytona mipakita sa mga dokumentong nagmatuod nga nasunod sa mga tinun-an ang tanang mga rekisitos sa pagtapos sa ilang kurso ug nasulbad ra dayon kini ug na-schedule dayon ang pag-defend sa iyang thesis. Human sa ilang depensa sa thesis sa adlaw nga Biyernes nakapaso dayon sila sa petsa 17 adlaw nga Domingo.

Sa 18 ka mga reklamante, 17 lamang ang naka-graduate sukwahi sa nahaunang report nga dul-an sa 30 ka mga tinun-an nga gikatakdang mo-graduate ang mireklamo pagklaro pa sa maong tinun-an. Giangkon hinuon niini nga ang ilang graduation unang gitakda niadto pang Marso 27 apan giuktaba kini ngadto na sa Abril 20 apan wala gihapon kini madayon hangtud nga miduso na sila og reklamo ngadto sa Ched.

Gitataw usab niini nga giingnan sila ni Bono kinsa mao usab ang school administrator nga dili pa sila makagraduate tungod kay wala pa kini grado sa pre-oral ug final defense sa ilang thesis. Si Bono gikatahong atua sa Dubai niadtong mga adlawa nga gikatakdang mo-depensa sila sa ilang thesis apan gumikan kay gusto nilang makapaso misanong sila nga himuon kini pinaagi sa teleconference apan wala gihapoy nakapasar niini gumikan sa nagkalain-laing rason.

Si Atty. Marcelo Bacalso nga maoy nangabugar sa mga tinun-an mikwestyon paghimong compulsory sa thesis tungod kay wala man kini sa ilang curriculum ug mihulagway niining ‘insertion’ lang kini kay kini gidugang tungatunga na sa klase. - Chester Abadilla (BANAT NEWS)