Mahuyang gigulgol namatay

CEBU, Philippines – Giluglog ang liog ug namatay ang usa ka gituuhang bayot nga mi-check-in sa Hawaiian Village sa barangay Marigondon sa dakbayan sa Lapulapu dihang napalgan alas-3 pasado kagahapon sa kaadlawon.

Si PO1 John Philip Gilmaro sa homicide section sa kapolisan sa dakbayan sa Lapulapu miingon nga nagbuy-od na ang biktima ug patay na ug naligo na sa kaugalingong dugo dihang nakit-an sa usa sa mga roomboy.

Gihulagway sa kapolisan nga gibana-banang nagpangidaron pa ang biktima og 20 anyos pataas ug 5’5 ang height, ang patay’ng lawas niini naa na karon gipahimutang sa Cosmopolitan Funeral Homes sa Sugbu.

Si Melvin Gutierrez, nagpuyo sa maong dapit maoy roomboy mitug-an sa kapolisan nga mi-check-in ang biktima kuyog ang usa ka batan-ong lalaki pipila ka oras na ang nakalabay una pa kini madiskubrehing wala nay kinabuhi.

Gikatahong dangtan ang pipila ka minutos gikan sa pagsulod sa biktima ug sa batan-ong kuyog dunay laing batan-ong lalaking misunod ug nabantayang miposte ra diha sa gawas sa room 3 nga gisudlan sa biktima ug sa kauban niini.

Natingala na lang ang roomboy nga nagdinaganay sa paggawas sa ilang tugkaran ang batan-ong lalaking kuyog sa biktima kuyog na niini ang laing batan-ong diha ra miposte sa gawas ug nanakay og traysikol.

Kini hinungdan nga daling gisusi ni Gutierrez ang lawak sa biktima ug mao nalay iyang nakit-an nga nagbuy-od na kini ug nagsugwak ang dugo gikan sa iyang liog ug wala nay kinabuhi.

Naproblema ang kapolisan gumikan kay bisan usa ka ilhanan sa pagkatawo sa biktima walay nakita diha sa lawak, gituuhang gihimulbulan sa mga mamumuno ang biktima gumikan kay walay narekober nga butang diha sa maong lawak nga magamit aron pag-ila sa gipatay.

Usa sa gitan-aw nga anggulo karon mao ang posibilidad nga giunay og tulis ang biktima sa iyang kaubang batan-on. - Romeo Limpangog (BANAT NEWS)