Engineer gisuwaya'g tulis, gipatay

CEBU, Philippines – Patay ang usa ka electronic engineer human mosuway og ikyas gikan sa mga tulisang mitulis sa gisakyan niining pasaheroang multicab diha sa dalan Maximo Patalinjug sa barangay Basak, dakbayan sa Lapulapu alas 7 pasado ang takna sa miaging gabii.

Ang biktima mao si Rexel Gonzales, 25, taga dakbayan sa Talisay ug kawani sa usa ka export company nga nagbase sa MEPZ-2 sa Basak Eva, dakbayan sa Lapulapu.

Tulo ka wala mailhing mga lalaki ang gitumbok nga mipusil ug mipatay sa biktima kinsa daling nanakay og traysikol atol sa ilang pag-ikyas.

Si PO1 John Philip Gilmaro sa homicide section sa kapolisan sa dakbayan sa Lapulapu miingon nga gikan pa sa dakbayan sa Mandaue ang multicab nga pasaheroan ug ang biktima padulong na mosulod sa iyang trabaho.

Gikatahong misakay ang mga tulisan duol sa usa ka gasoline station sa maong dapit ug pag-abot sa eskina sa dalan padulong sa barangay Basak kalit lang miibot sa ilang mga armas ang tulo ug gitionan ang drayber nga si Rowen Guinita Colonia, 27, nga di mosukol tungod kay pamugas ra ang ilang tuyo.

Usa sa mga tulisan ang mimandong pahinayan ang padagan sa sakyanan ug gumikan sa kabalakang pusilon misunod si Colonia sa mando.

Apan ang biktima nakamatikod sa laing linihukan sa tulo ug nakugang nalang pagbunot og armas sa tulo ka mga pasahero hinungdan nga nagdali kini pag-ambak sa multicab apan gipusil siya sa tulo diha sa buko-buko.

Ang biktima wala makuhai sa iyang kolor green nga bag apan gumikan sa igo sa bala ug sa pag-ambak gikan sa sakyanan nahagba kini sa yuta.

Ang mga tulisan human mapusili ang biktima daling nanakay og usa ka traysikol ug miikyas padulong sa barangay Gun-ob sa nahisgotang dakbayan. - Romeo Limpangog (BANAT NEWS)