Magtiayong NPA mitahan sa militar

CEBU, Philippines – Usa ka aktibong ranking leader sa New Peoples Army nga nag-operate sa Negros uban sa iyang asawa ug laing usa pa ka miyembro sa NPA nga nagbase dinhi sa lalawigan ubos sa Komiteng Rehiyonal Sentral Bisayas (KRSB) ang boluntaryong mitahan sa mga sakop sa 78th Infantry Battalion.

Kagahapon sa udto, ang magtiayon ug laing usa ka miyembro sa NPA gi-presentar sa militar ug kapolisan ngadto kang Gobernador Gwendolyn Garcia human motahan niadtong Mayo 12.

Sila mao ang magtiayong Paulino Lingues nga dunay mga alyas nga Gido, Verge, Akje, 37-anyos ug lumad nga taga Dagohoy, Bilar, Bohol ug iyang asawang si Flordelis Manulat nga may alyas nga Pamela, 27-anyos nga taga Lawaan, Danao City uban ang duha nila ka anak babaye ug lalaki.

Apan sila temporaryong anaa nagpuyo sa sitio Libo barangay Tayud sa lungsod sa Consolacion, samtang ang ikatulong aktibong NPA nga mitahan mao si Rey Getio nga may mga alyas nga Enrick, Romnick, 25, taga barangay Kagbao, Tuburan kinsa usa ka squad member sa nabungkag nga Front Committee 2 KRSB nga nagbase usab diha sa mid-north area.

Si Lingues usa ka Cadre Officer (CO) sa platoon 2, Southeast Front (SEF) sa KRSB nga nagbase sa Negros Oriental samtang ang iyang asawa usa ka regular NPA fighter ug squad member sa nabungkag nga Front Committee 2, KRSB nga nagbase sa mid-north area.

Si Manulat midangop kang Mayor Ramonito Durano sa dakbayan sa Danao aron agnihon ang iyang bana pagbalik na sa gobiyerno tungod ug alang sa ilang mga anak.

 Matud pa sa magtiayong Lingues nga niadtong Marso 29, 2007 nakadawat sila’g kamanduan gikan sa ilang labaw nga ang tanang sakop sa Cebu ug Bohol maghiusa nalang sa Negros apan si Manulat wala na mokuyog sa iyang banang si Lingues didto sa Negros.

Si Lingues maoy nipuli isip Cadre Officer dihang si Federico “Ka Val” Villalongha, 45, taga Catigbian, Bohol,   namatay sa engkwentro tali sa mga sakop sa 79th IB didto sa Dauin, Negros Oriental niadtong Septembre 2008.

Uban sa nangamatay atol sa maong engkuwentro mao ang duha ka Sugbuanong sila si Jerry “Ka Regan” Cabungcag, 27, nga taga barangay Ermita ug Rachelle Mae Palang, 21, taga Consolacion nga usa ka tinun-ang aktibista.

Nasamdan niadtong Nobiyembre 2005 si Lingues dihang ang iyang grupo naka-engkuwentro sa mga sakop sa 19th IB sa barangay Ambakan, Baybay, Leyte.

Kuyog usab sila sa engkwentro sa 78th IB sa Kalangahan, Tuburan niadtong 2003, ug barangay Ipil, sa Carmen, Cebu sa samang tuig ingon man sa pag-atake sa detachment sa Caurasan, Carmen diin upat ka sundawo ang namatay niadtong 2002.

Si Gov. Garcia sa iyang bahin nangangkong epektibo ang all-out war nga iyang gihimo batok sa insurhensya ug mapasalamaton sa mga rebeldeng nibalik na sa gobiyerno.

Lakip sa mitambong kagahapon mao si Col. Allan Luga, commander sa 802nd Brigade nga nagbase sa Carmen, Bohol, Lt. Col. Raymundo Bañares, Battalion Commander sa 78th IB, Lt. Col Oscar Lasangue, Chief Supt. Darius Tuason maoy Deputy Regional Director for Administration (DRDA) sa PRO-7 ug Supt. Erson Digal kasamtangang pangulo sa CPPO, Mayor Boyet Suezo sa Tuburan ug konsehal sa siyudad sa Danao nga si Boying Rodriguez. – BANAT NEWS