Satellite registration padayon

CEBU, Philippines – Ipadayon ugmang adlawa sa Cebu City Comelec North District ang nasugdan na niini matag Sabado nga satellite registration sa kabarangayan sa dakbayan.

Matud ni City Election Officer Attorney Marchel Sarno nga ilang balikon ugmang adlawa ang barangay Guba nga usa sa mga bukirang barangay sa siyudad gumikan kay daghan pang wala makaparehistro atol sa ilang pagduaw kaniadto.

“Kanang barangay Guba strategic man gud ang maong lugar, daghan kaayo og kasikbit nga mga barangay ba mao nga among balikon,” dugang ni Sarno. Subay niini giawhag sa election officer ang mga molupyo sa kasikbit nga mga barangay pag-adto sa barangay hall sa Guba ugmang adlawa aron adto na magparehistro ilabi na niadtong dili makalugar sa laing mga adlaw nga makadalikyat sa buhatan sa Comelec tungod kay dunay mga trabaho.   Lakip sa giawhag ni Sarno nga magparehistro mao kadtong mag-18 anyos atol sa adlaw sa eleksyon unya sa buwan sa Mayo sa sunod tuig. Miingon si Sarno nga kadtong magparehistro gikinahanglan lang nga magdala og Identification (ID) card o dili ba hinuon sa ilang birth certificate.

Nasayran nga karong sunod Sabado human sa Guba ang barangay Pit-os na usab ang duawon sa Comelec ug pahigayunan sa satellite registration. Una nang naduaw sa Comelec alang sa offsite registration ang barangay Tejero, Adlaon, Lahug, Lusaran, ingon man ang tunghaan sa Universtiy of Cebu diha sa Banilad. - Elly Bolonos (BANAT NEWS)