CEBU, Philippines – Mobisita dinhi sa Sugbu si Energy Secretary Angelo Reyes karong adlawa aron sa pagtambong sa General Membership Meeting sa Cebu Chambers of Commerce and Industry kon CCCI karong adlawa sa Marco Polo Plaza Hotel mga alas 6:00 sa kagabii.
Ang buhatan sa CCCI president Consul Samuel Chioson mitug-an nga ilang ipresentar atubangan ni Reyes ang comparative study labot sa oil prices sa Manila, Ilo-ilo, Bacolod ug Cebu.
Base sa nakuha sa CCCI nga price monitoring gikan sa Department of Energy sukad niadtong Abril 24 ning tuiga nakita nga ang mga oil companies dinhi sa Sugbu sama sa Shell, Petron ug Caltex mas mahal og presyo sa ilang oil products itandi sa ubang mga lugar.
Tumong sa grupo sa mga negosyante sa maong presentasyon nga mapangayuan og katin-awan si Reyes ug aron usab masayran sa kalihim nga walay gihimong aksyon ang DOE kabahin niini.
Gawas ni Reyes pipila usab ka mga lokal nga opisyal dinhi sa Sugbu ang gipaabot nga motambong sa maong tigum. - Chester Abadilla (BANAT NEWS)