Hepe sa Borbon girelibohan ni Digal

CEBU, Philippines – Gipa-relibuhan na sugod niadtong miaging adlaw ang hepe sa Borbon Police Station nga si Inspector Camilo Gonzaga human gi-iskapuhan og piniriso niadtong milabay’ng semana.

Si Supt. Erson Digal ang Officer-in-Charge (OIC) sa Cebu Provincial Police Office (CPPO) nagkanayon napupos na ang 72-oras nga iyang gitagal sa kapulisan sa Borbon aron madakpan og balik si Edison Cabahug. Si Cabahug nag-atubang og kasong illegal drugs ug illegal possession of firearm.

Matud pa ni Digal nga si Sr. Insp. Francis Errol Deveyra ang kanhi hepe sa lungsod sa San Fernando maoy iyang gitudlong (OIC) sa Borbon Police Station samtang si Gonzaga ibutang sa Operations Office sa CPPO ug ang jailer nga si PO1 Bonifacio Gabud girelibuhan usab kini ug gibutang sa Provincial Security Service Group (PSSG).

Ang Provincial Investigation and Detection Management Branch (PIDMB) maoy nag-imbestigar kang Gonzaga ug Gabud sa kasong administratiba.

Matud pa ni Digal nga dunay pagtugot ni Police Regional Office-7 director Chief Supt. Federico Terte ug mayor sa Borbon ang maong pagrelibo.

Pahimangno pa ni Digal nga leksyon kini sa ubang mga hepe nga angayang tan-awon nga di sila angayang magmika sa ilang trabaho.

Si Deveyra na maoy mopadayon pagpangita sa mi-eskapong si Cabahug samtang gimandoan kining hingusgan pa ang kampanya sa ilegal nga drugas ug sugal sa nahisgutang lungsod. – BANAT NEWS