Wala nakapaso nga mga tinun-an mireklamo

CEBU, Philippines – Mitiyabaw ang dul-an 30 ka mga tinun-an sa Divine Mercy Computer College nga nahimutang sa Tanchan Building, Colon St. sa Cebu City tungod kay hangtud karon wala pa gihapon sila ka-graduate.

Si Emelio Secretaria, 24, taga Sudlon, Cebu City nga mikuha sa kursong Associate in Computer Technology sa maong tunghaan uban sa 18 ka mga graduating students karong tuiga miduso og reklamo ngadto sa Commission on Higher Education kon CHED batok sa ilang maestra, college administrator ug Vice President Dr. Maria Davina Bono.

Si Secretaria ug mga kaubanang mga tinun-an mitug-an diha sa ilang sulat reklamo ngadto kang CHED -7 OIC regional director Candelario Aytona nga gitakda sa ilang tunghaan ang graduation niadto pang Marso 27 apan gi-postpone kini ngadto sa Abril 20 ning tuiga apan hangtud karon wala gihapon kini madayon.

Matud pa ni Secrataria ug kaubanan nga ang giingong rason nga wala sila makapaso kini gumikan kay wala pa silay grado sa pre-oral ug final defense sa ilang thesis.

Apan sa maong reklamo mipasabot usab ang maong mga estudyante nga kanunay silang kasab-an ni Bono atol na sa ilang final defense nga gi-schedule gikan sa ala 1:00 hangtud sa alas 8:00 sa gabii pinaagi sa teleconference.

Si Bono gikatahong tua sa nasud sa Dubai uban sa iyang bana nga mao usab ang presidente sa maong tunghaan sukad pa niadtong miaging tuig maong ang ilang pagdepensa anha ipaagi sa teleconference.

Gikatahong ang ilang sayop sa format, grammar ug uban pa maoy hinungdan nga wala gyuy bisan usa kanila ang milampos sa pag-depensa sa ilang thesis ug maoy rason nganong walay bisan usa kanila ang naka-graduate.

Misamot ang ilang kaguol dihang ilaha nalang untang kuhaon ang ilang mga Transcript of Records aron magamit nila sa pagpanarbaho apan wala sila tuguting makuha kini sa rason nga wala pa sila maka-graduate.

Sa 24 ka graduating students sa kursong Associate in Computer Technology 18 lamang nipirma sa reklamo. May lima pa usab ka mga tinun-an sa Bachelor of Science in Information Technology ang wala gihapon makagradwar apan nagdumili sa pagreklamo.

Gawas ni Secretaria nipirma usab ang 16 pa ka mga tinun-an. Gisulayan sa pagtawag sa Banat News ang management sa Divine Mercy Computer College apan ang secretary nga nakatubag sa telepono nagdumili sa pagtubag sa isyu kay bugtong makahimo niini mao lang si Bono. - Chester Abadilla (BANAT NEWS)