Naalaang sakop sa gang managsuon gipusil, usa ang namatay

CEBU, Philippines – Patay ang usa ka batan-on samtang samdan ang igsuon niini human pamusila sa mga grupo sa gang pasado alas 6 kagahapon sa gabii duol sa entrance sa Ludo Cemetery sa dalan A. Soriano barangay Carreta.

Ang patay nailhan nga si Rogelio “Ian” Oliamot,19, usa ka 3rd year student sa Florencio Urot High School ug molupyo sa sitio Ponce 1 barangay Carreta samtang samdan usab ang manghod niini nga si Romnick “Onie” Oliamot, 3rd year student usab sa maong eskuylahan.

Sa imbestigasyon sa kapolisan nasayran nga ang managsuon naglingkod-lingkod sa nahisgutang lugar sa dihang kalit lang nga nangabot ang grupo sa mga suspetsado ug gipamusil ang managsuon.

Ang namatay naigo sa walang bahin sa hawak hinungdan sa hinanaling kamatayon niini samtang ang manghod niini naigo usab sa walang bahin sa lawas.

Ang mga suspetsado daling nakaipsot palayo sa maong lugar, ang mga biktima gidala sa Cebu City Medical Center apan ang manghod lang ang naluwas.

Matud pa ni PO2 Leroy Baguio sa Cebu City Police Office, Homicide Section sa pakighinabi sa Banat News nga aduna na silay mga pangalan sa suspetsado apan dili pa nila mapagawas sa publiko.

Dugang pa ni Baguio nga ang managsuon dili miyembro sa mga gang apan ang ilang mga higala nga kanunay’ng kauban maoy mga miyembro sa karibal nga gang sa mga suspek.

Samtang sa laing bahin, usa ka batan-on ang gikulata ug gipusil sa tulo ka lalaki sa sitio Balangkapuna, barangay Sambag 1 pasado alas 2 sa buntag kagahapon.

Si Eduard Degulacion,18, lumad nga taga Tugas Western Poblacion San Francisco, Camotes ug kasamtangang nagpuyo sa nahisgutang lugar gikatahong gikulata ug gipusil sa manag-agaw’ng Randy ug Totong Torrejos ug usa ka wala mailhing tawo.

 Ang biktima uban sa iyang mga higala padulong manguli gikan nag-inom sa ilang silingan sa dihang sa ilang pagpauli giatangan sila sa mga suspek.

Gikatahong kalit silang gibun-og sa grupo hinungdan nga nanagan sila palayo apan nakadungog nalang sila og buto sa armas ug diha nalang niya masayring naigo na siya sa walang bahin sa lubot.

Ang biktima gidala sa Cebu City Medical Center, nagtuo ang kapolisan nga paregla ang nahitabo sa biktima. - Lesley Caminade (BANAT NEWS)