CEBU, Philippines - Gipaabot nga makaduso na sa ilang report ang Fact-Finding Committee nga gitukod sa Cebu City Schools Division nga maoy gitahasan sa pag-imbistigar sa paglungag og lawom diha sa Don Vicente Rama Memorial National High School.
Napagya ang lawom nga lungag human ipadangat ang report ngadto kang Basak San Nicolas barangay captain George Rama kinsa mao usab ang mipahibawo kang Acting Mayor Michael Rama sa maong isyu.
Walay pagduha-duha ang acting mayor pagpatabon sa lungag tungod sa iyang kabalaka nga aduna unyay mga tinun-an nga mahulog niini.
Apan giinsister sa principal sa tunghaan nga si Nympha Balili nga ang lungag ilang himoon nga compost pit alang sa mga basura sa eskuylahan.
Apan dili kombinsido si Rama sa gihimong pagpasabot sa principal hinungdan nga kini iyang gipaimbistigahan sa hingtungdang mga buhatan.
Ang gihimong pakisusi sa Committee on Education sa City Council nga gipanguluhan ni konsehal Gerardo Carillo nagbutyag nga sobra ra kaayo ang gilawmon sa maong lungag alang sa usa ka compost pit.
Sama kang Rama, nagduda usab ang konsehal nga dunay gipahigayong treasure hunting diha sa nahisgutang tunghaan.
Giduso gilayon ni Carillo ngadto sa Cebu City Schools Division ang ilang findings ug recommendations alang sa tukmang lakang nga himoon.
Apan si City Schools Division Superintendent Doctor Lorna Rances mitukod usab og komitiba nga mopalawom sa gipahigayong imbistigasyon.
Pormal nang gisugdan ang fact-finding investigation niadtong Biyernes ug gipaabot ni Rances nga kini makaduso na og rekomendasyon ugmang adlawa.
Lakip sa gipaimbistigar ni Rances sa gitukod nga komitiba mao ang mga nagkawot sa lungag ug ang agriculture teacher gawas sa principal.
Gipasalig ni Rances ang pagpahamtang og disciplinary action kung masuta sa gihimong pakisusi nga dunay nahimong kalapasan ang mga hingtungdan. - Elly Bolonos (BANAT NEWS)