CEBU, Philippines - Pabiling nagkuwang ang mga lawak saringan sa nagkadaiyang mga publikong tunghaan sa dakbayan sa Sugbu alang sa sunod tuig-tingtungha sumala ni City Hall Education Consultant Joy Augustus Young.
Matud ni Young nga labing minus 250 ka classroom ang gikinahanglan sa mga publikong tunghaan sa dakbayan alang sa umaabot nga pagbukas sa klase.
Kini bisan pa man kung ang City government uban sa Cebu City Schools Division giingong nakapatukod na og gatusan ka mga classroom sa miaging tuig.
Gitataw ni Young nga kini wala pay labot sa mga lawak usab alang sa dental, library, computer room, science laboratory ug kwarto sa principal.
Gani miingon si Young nga tukoranan pa usab og nagkadaiyang mga lawak saringan ang tanang tunghaan sa elementarya alang sa mga tinun-an sa Kinder.
Apan sa kasamtangan miingon ang education consultant nga ilang gihatagan og prayoridad ang labing nanginahanglan og classroom nga mga tunghaan.
Kini sama sa Basak San Nicolas, Day-as, Barrio Luz, Pardo, Quiot, Zapatera, Labangon, ug pipila ka mga tunghaan sa bukirang mga barangay.
Gipahibawo hinuon ni Young nga nagpadayon karon ang pagpatukod sa city government og mga classroom sa halos tanang mga tunghaan sa siyudad.
Gani midugang siya nga ang uban niini giingong magamit na sa mga tinun-an atol sa pagbukas sa klase karong Hunyo 1. - Elly Bolonos (BANAT NEWS)