Kinsay pillion

CEBU, Philippines – Alas tres na sa kabuntagon apan hangtod karon wala pa ako makatulog. Mga unom na ka oras nga ang akong galamhan gihakop sa tumang kalibog, kahadlok ug kabalisa.

Naglibog gayod ako kun kinsay akong ubanan diha sa salag sa kaminyoon. Si Fred ba nga usa kanhi ka fashion model, law student ug magsusulat o si Cesar ba nga usa ka multi-millionaire apan 80 anyos na.

Si Fred ug si Cesar maoy akong pinasidunggang dinapit atol sa kasumaran sa akong adlaw nga natawhan ugma. Diin akong ipakanaug ang akong hukom kun kinsa kanila ang akong pilion.

Si Fred tinuoray gayod nga nahigugma kanako. Apan nahadlok ako nga makigminyo kaniya kay wala siya’y klaro nga pangita. Kay nag-agad man lang siya sa luna sa tabloid nga kabutangan pa sa iyang sugilanon. Nag-agad usab siya sa kalidad sa iyang estorya ug sa kalooy sa editor.

Samtang si Cesar adunay duha ka mansiyon ug mga luho nga sakyanan.

Guwapo si Fred, masaaron ug batan-on. Matinud-anon usab siya sa paghimo kanako nga rayna sa iyang panimalay. Apan, ako karon nga nahunahuna nga niining atong ekonomikanhong krisis karon ang kabatan-on, kamasaaron ug kaguwapo ni Fred wala gayo’y mahimo.

Gani, aduna nay daghang higayon nga kami si Fred nanihapon lang og sopas kay wa siya’y nahot. Natibuok na karon ang akong hukom nga si Cesar maoy akong kuyogan sa altar sa kaminyoon. Kay diha sa iyang mga kamot seguro na ang akong mahayag nga kaugmaon. – BANAT NEWS