Drayber giluba taxi gikarnap

CEBU, Philippines – Usa ka drayber sa taxi , gawas nga giluba, gikarnap pa gyud sa tulisan niyang pasahero ang iyang taxi didto sa San Jose Village, barangay Tisa ning dakbayan sa Sugbo kagahapon sa alas 2:00 sa kaadlawon.Hinuon ang maong taxi anaa na karon sa buhatan sa trapiko sa dakbayan sa Talisay human kini ibilin sa karnaper didto sa barangay Tabunok kagahapon sa buntag.

Si SPO3 Socrates Bacalso sa Labangon Police Station miila sa biktma nga si Vicente Ramos Villarino,61, nga taga sitio Sindulan, barangay Mabolo, kinsa samdan sa buko-buko ug dughan agi sa dinunggaban sa kutsilyo nga gigamit sa tulisan niyang pasahero.

Nasayran nga ang biktima mipasakay sa wala hiilhing tawo didto sa San Jose Village, dihang human sa pipila ka gutlo samtang nagdagan na ang taxi, mipahibawo kining “hold-up”.

Gumikan kay wala mokihol ang drayber, giduslak sa iyang kutsilyo ang bukobuko ug dughan sa biktima ug dihang nawad-an kini’g panimuot nakahigayon ang tulisan sa pagkuha sa iyang kinitaang kwarta nga nagkantidad   og P1,900 sa iyang pitaka.

 Wala pa makontento, giguyod sa gawas ang drayber ug gikarnap ang taxi niini.

Matud pa ni SPO3 Bacalso nga nagpabilin pang walay panimuot ang biktima sulod sa Cebu City Medical Center, samtang padayon pa nilang gipangita karon ang mitulis sa biktima. (BANAT NEWS)