Persona non grata nga silot sa duha ka German sobra ra - Hunta

CEBU, Philippines – Gihangyo sa mga sakop sa Hunta Probinsiyal ang kagamhanan sa lungsod sa Alcoy nga isibog ang nahaunang deklarasyon nga i-persona non grata ang duha ka mga German nationals nga nagpuyo sa lungsod sa Alcoy tungod sa reklamo sa mga tawo sa ilang dili maayong pamatasan.

Gikabalak-an sa Hunta nga maapektahan unya ang turismo sa Sugbu particular na sa maong lungsod sumala pa ni Bokal Agnes Magpale.

Apan sa resolusyon niini iyang gipahimangnoan ang duha ka mga Germans nga magmatngon sa ilang pamatasan tratamento sa mga residente sa lungsod sa Alcoy.

Sa gipahigayong fact finding inquiry sa Committee on Tourism and International Affairs sa Hunta niadtong Mayo 15,2009 nasuta nga sila si Tomas Hudak ug Wolfgang Muller nangayo na og pasaylo ngadto sa mireklamong residente.

Kini diha gipaagi sa mga municipal officials nga gidawat usab uban ang hugot nga pagbaud nga dili na sublion ang paghimo niini.

Una nang mihimo resolusyon ang konseho sa lungsod nga nagdeklarar sa duha nga persona non grata niadtong nakalabay’ng bulan tungod sa kabati sa ilang pamatasan, pagbugalbugal ug pagka-arogante ngadto sa mga residente.

Matud pa ni Magpale nga ilang girespetuhan ang paggamit sa gahum sa mga opisyales sa Alcoy apan gikinahanglan di kini makaapekto sa turismo sa maong lungsod ug ingon sa probinsiya sa Sugbu.

Giklaro niini nga ang desisyon sa maong komitiba wala magpabor sa duha ka habig kun dili gipatigbabaw lamang niini ang hustisya, lokal nga turismo, tawhanong rason ug labaw sa tanan ang interest sa kinabag-ang Sugbuanon. - Chester Abadilla (BANAT NEWS)