CEBU, Philippines – Patay ang drayber sa motorsiklo ug ang iyang angkas human madasmagi sa bus pasaheroan ug napasok ug nabagnos sa ilawom niini sulod sa pipila ka metros sa highway sa barangay Cayang siyudad sa Bogo niadtong Domingo sa alas 8:10 sa gabii.
Ang drayber nga wala na makaabot nga buhi sa tambalanan mao si Remegio Argawanon Ylanan, 35, taga barangay Anapog, San Remegio samtang ang angkas niini mao si Domingo Verdida Maitom, 54, taga barangay Cayang, Bogo.
Samtang ang drayber sa Rough Rider bus nga dunay plaka nga GVY-274 mao si Reokent Bawiga Alfuerto, 24, taga barangay Ylaya, Dumangjug.
Matud pa ni PO3 Ramonito Canja sa Bogo City Police dihang nahinabi sa Banat News nga ang bus ug motorsiklo nagsunod subay sa highway paingon sa barangay Cayang gikan sa Bogo Proper.
Pag-abot sa nahisgutang lugar mimenor ang motorsiklo aron unta moliko sa walang bahin apan naatol nga mao say paghunat sa bus nga mo-overtake ug wala na makabantay sa motorsiklo sa iyang atubangan.
Diha-diha napasok ang motorsiklo ug nabangil sa ilawom apan wala dayon maka-break ang drayber hinungdan nga nabagnos pa ang mga biktima uban sa ilang motorsiklo diha sa ilawom.
Si Ylanan daling gitabang sa mga estambay kinsa nakit-an pang naglihok apan nakuyapan dayon ug gidali pagdala sa Severo Verallo District Hospital apan gideklarar kining dead on arrival.
Samtang ang iyang angkas nga miungot sa ilawom sa bus wala na usab matabang gumikan kay nakabsan na kini sa kinabuhi una pa makuha gikan sa gikahimutangan human sa kapin usa ka oras nga pagpangita og paaging makuha kini.
Sumala pa sa kapolisan napiyapi og maayo si Verdida tungod kay nalatayan kini sa ligid. Ang drayber sa bus boluntaryong mitahan sa iyang kaugalingon ngadto sa kapulisan ug nagpaabot sa tukmang kaso nga ipasaka batok niya. - Darel Carumba (BANAT NEWS)