Paghunong sa towing gisalikway ni Mike

CEBU, Philippines – Gisalikway ni acting Mayor Michael Rama ang panawagan sa ubang kritiko sa administrasyon nga ihunong una ang operasyon sa towing services sa siyudad.

Kini samtang ipahigayon pa ang imbestigasyon sa nahitabong pagkulata sa usa ka motorcycle driver nga gidakop tungod lang sa wala pagsul-ob niini og helmet.

Ang biktima nga si Freddie Teopez nalandig sa tambalanan human giingong gidumbol sa towing truck nga iya sa One Stop Towing Services ang gimaneho niining motorsiklo.

Nadugangan ang angol sa biktima sa dihang ang team leader nga sakay sa towing truck nga giila nga usa ka Glencel Arnaiz giingong mipatid-patid pa ni Teopez.

Tungod niini, gihagit si Rama ilabi na ni Tinago barangay councilor Joel Garganera sa pagpahunong una sa operasyon sa duha ka towing services sa siyudad.

Apan matud sa acting mayor nga siya walay plano nga kini himuon taliwala sa iyang pagpakabana sa nahisgutang kontrobersiya.

“It’s not in my mind but the concerned of it not having repeated is the primary thing that I would like to achieve,”sumala ni Rama.

Kini nagpasabot nga magpadayon ang operasyon sa Road Warrior Towing Services ingon man sa kontrobersyal nga One Stop Towing Services.

Gipa-imbestigahan na hinuon sa acting mayor ngadto sa City Traffic Operations and Management (Citom) ang nahisgutang hitabo.

Samtang gipahimangnoan usab ni Rama ang duha ka towing services sa dakbayan nga estriktong mosunod sa nalatid sa guidelines sa towing ordinance.

“If there is an existing guidelines and that guidelines is still fair and reasonable, then stick to the guidelines,”dugang pamahayag ni Rama.

Sa pikas bahin gipakigtagboan usab sa acting mayor ang mga konsehal sa siyudad kagahapong adlawa pagtuki sa implementing guidelines. - Elly Bolonos (BANAT NEWS)