CEBU, Philippines – Giawhag sa tigpamaba ni kanhi Mayor Thadeo Ouano sa dakbayan sa Mandaue ang Ombudsman Visayas sa dili pagluwat og pamahayag nga dili tukma sa desisyon niini.
Si Jonji Gonzales, ang tigpamaba ni Ouano, nagkanayon nga subo kaayong palandungon nga moluwat ang opisyal sa Ombudsman og pamahayag nga layo sa nakasulat sa desisyon niini sa kaso ni Ouano mahitungod sa kontrobersiya sa pagpamalit og lamppost nga gigamit pagpanindot sa Metro Cebu atol sa nakalabay’ng Asean summit.
“It is very unfortunate that the Visayas Ombudsman is saying one thing to the media; while saying another in the decisions they wrote dismissing the cases against Mayor Ouano,” si Gonzales sa iyang pamahayag nga gipadangat sa Banat News nagkanayon.
Sumala pa niya nga ang mga dokumento sa Ombudsman Visayas nagpakita nga tulo sa upat ka kaso ni Ouano nga giimbestigar og balik sa maong buhatan gi-dismiss niini.
Ang rason sa Ombudsman mao ang ka-walay partisipasyon ni Ouano ug Mayor Arturo Radaza sa mga kontratang gi-apilan sa DPWH sa kauluhan.
Sa pagka-dismiss sa tulo ka kaso, nakakita ang mayor og domino effect.
“In sum, their case is clearly weakening,” dugang pa ni Gonzales. - Wen Celen (BANAT NEWS)