OFW gisaka sa balay, gipatay

CEBU, Philippines – Patay ang usa ka overseas Filipino worker kun (OFW) human kini dunggaba sud sa iyang panimalay didto sa Sitio Holy Child Barangay. Looc dakbayan sa Lapulapu kagahapon sa kadlawon.

Ang biktima mao si Aguinaldo Peñaranda Dungog, 44, minyo ug residente sa maong dapit ug usa ka OFW gikan sa nasud sa Qatar.

Base sa pasiunang imbestigasyon ni SPO1 Frederick Eslit sa Crime Against Person sa kapolisan sa Lapulapu nasayran nga nahinanok sa paghikatulog si Dungog sa iyang panimalay sa dihang gisaka kini sa wala mailhing tawo ug gidunggab tumong sa iyang dughan.

Bisan og samaran misuway sa pagbalos si Dungog sa mamumuno gumikan sa nakitang lama sa mga tunob niini nga nagkadugo apan wala na kini molampos human mahagba sa kusina ang biktima ug namatay.

Nasuta sa kapolisan nga giguba ang decorative blocks sa kusina diin maoy giagian sa mamumuno.

Matud pa ni SPO1 Eslit nga usa sa silingan sa biktima nakakita og tulo ka tawo nga gikan sa panimalay ni Dungog apan wala kini makaila sa maong mga tawo human kini magdali og biya sa maong panimalay.

Dili tulis ang tuyo sa mga suspetsado gumikan kay walay nawagtang sa mga personal nga gamit ni Dungog ug wala usab magkatag ang mga gamit niini sa panimalay, sumala pa ni SPO1 Eslit.

Gidudahan ni Eslit ang posibleng “love triangle” ang anggulo sa krimen gumikan kay ilang nasayran nga si Dungog dugay na nga bulag sa asawa ug aduna kini uyab sa lungsod sa Lilo-an.

Sa milabay’ng tuig miuli si Dungog gikan sa nasud sa Qatar ug mibalik na kini og pang aplay og trabaho sa gawas sa naud ug sa dihang mipauli na kini sa dakbayan sa Lapulapu wala mouli si Dungog sa iyang pamilya ug didto kini magpuyo sa iyang ginikanan.

Sa maong sitwasyon misaad si Dungog nga dili na siya mobalik ngadto sa iyang uyab diin posibleng maoy makahatag og katin-awan sa kasong pagpatay sa OFW.

Hinuon padayon pa ang imbestigasyon sa kapolisan sa Lapulapu kalabot sa maong insedente ug sa pag-ila sa maong responsable sa krimen. – BANAT NEWS