Polis gipaalerto batok tulisan

CEBU, Philippines - Gipaalerto karon sa mga sakop sa hunta probinsiyal ang kapolisan sa lalawigan sa Sugbu nunot sa mga report nga may grupo sa mga tulisan gikan sa Mindanao nga ania maglihok karon sa Sugbu.

Si Provincial board member Juan Bolo mipalabang og resolusyon nga mibase ning tanan sa nadawat niyang report gikan ni Cebu City Police Office Director, Sr. Supt.  Patrocenio Comendador kinsa nagpahibawo nga ang maong mga tulisan bag-ohay lang miabot dinhi sa Sugbu.

Nasayran nga ang maong grupo kauban sa mga tulisan nga mitulis sa Fooda Saver’s Mart niadtong miaging bulan kinsa nagsul-ob og mga uniporme sa kapolisan.

Matud pa ni Comendador nga ang maong grupo sa mga tulisan motulis og mga bangko, pawnshop, dagkong tindahan ug uban pang financial institution.

Matud pa ni Bolo nga mao kini ang hinungdan nga iyang giawhag ang kapolisan sa lalawigan sa Sugbu nga mangandam kanunay ug makig-alayon sa ubang intelligence community aron mapakgang ang operasyon  sa maong grupo sa mga tulisan. - BANAT NEWS