Castro hingpit nang gitangtang sa BI

CEBU, Philippines - Hingpit nang gitangtang sa Department of Justice ang kontrobersiyal nga lady fiscal Mary Ann Castro gikan sa Bureau of Immigration tungod sa nagkagrabeng panagsungi niini sa regional director sa BI nga si Casimero Madarang III ug ubang mga opisyal ug kawani sa BI. Si Immigration Commissioner Marcelo Libanan niisyu og memorandum order nga gipetsahan niadtong Mayo 7, 2009 nga nagtangtang na ni Castro gikan sa pakasakop sa Bureau of Immigration.

Kini agi og katumanan sa nahaunang kamanduan nga giluwatan ni Justice Secretary Raul Gonzales niadtong Mayo 4 nga nagbakwi sa detail order ni Castro sa BI-7.

“In the interest of the service and pursuant to the provision of existing law, the detail of Prosecutor 1 Mary Ann Castro of the Bureau of Immigration is hereby revoked”, matud pa ni Sec. Gonzales sa iyang usa ka pahina nga Department memorandum order number 310.

Si Gonzales mitumbok usab sa iyang kamanduan nga ang maong department order maoy mupatigbabaw sa mga nahaunang kamandaun nga giluwatan sa iyang buhatan.

Samtang si Commissioner Libanan sa iyang kamanduan nagkanayon nga ang kamanduan sa pagtangtang kang Castro diha sa Bureau of Immigration moepekto sa labing dali nga panahon sa higayon nga  madawat ni Castro ang maong kamanduan.

Subay niini si  Libanan nimando ngadto kang Castro nga i-surrender dayon ang iyang Bureau of Immigration Identification card ngadto sa administrative division sa BI.

Nasayran nga si Castro gipasanginlan nga may mga binuang ug pagpangwarta sa sulod sa bureau hinungdan nga gipasakaan kini og kaso ni BI-7 regional director Casimero Madarang ngadto sa Ombudsman.

Si Castro kusganong mihimakak sa mga pasangil ug mibawos ni Madarang  pagpasaka og kasong libelo tungod sa pagpasagad og tumotumo niini nga napublikar sa mga lokal nga pamantalaan.

Sigun sa kasaligang tinubdan, natumong nga si Presidente Gloria Macapagal Arroyo nakabasa sa maong balita nga nagbansiwag sa mga lokal nga pamantalaan nga mopasaka og kasong libilo si Castro batok kang Secretary Remonde dihang mibisita kini dinhi sa Sugbu hinungdan nga gipaklaro kini ni Arroyo ngadto kang Secretary Gonzales. - Chester Abadilla (BANAT NEWS)