8 na ang namatay sa dengue

CEBU, Philippines - Walo na ang patay sa dakbayan sa Sugbo nga pulos mga biktima sa sakit nga dengue sukad niadtong buwan sa Enero niining tuiga.

Ang labing ulahi nga biktima sa nahisgutang sakit mao ang usa 10 anyos nga bata nga molupyo sa barangay Lorega San Miguel.

Gidala unta ang bata ngadto sa Cebu City Medical Center niadtong Mayo 7 apan wala matabang sa mga mananambal ug namatay paglabay sa duha ka adlaw.

Mas ubos hinuon ang gidaghanon sa mga nakalas sa dengue niining tuiga itandi sa susamang period sa miaging tuig nga dunay 24 ang patay.

Apan ang dengue coordinator sa City Health Department nga si Dorenda Macasucol mitataw nga wala sila mahimuot sa maong kalamboan.

“Dili ta malipay ana kay naa man gihapoy mamatay, maningkamot gyud ta nga maluwas ang tanang masakit og dengue,” sumala ni Macasucol.

Matud ni Macasucol nga ang City Health Department nagpadayon karon sa hinugtanay nga kampanya batok sa nahisgutang makamatay nga sakit.

Kini ilabi na kay ang dengue cases gikatahong mosugod sa pagsaka sa buwan sa Hunyo diin magsugod usab ang panahon sa ting-uwan.

Lakip sa anti-dengue campaign nga gipasiugdahan sa City Health mao ang pagpahigayon og pulong-pulong ingon man mist spraying sa kabarangayan.

Samtang gipahinumduman usab ni Macasucol ang mga Sugbuanon nga ipadayon ang regular nga pagpanglimpyo sa palibot ug pagyabo sa napundong tubig.

Kini aron walay mamahimong kaitlogan ang mga lamok nga maoy nagdala sa nahisgutang makamatay nga sakit.

Sa kinatibuk-an, ang City Health nakatala na og 282 ka dengue cases sa siyudad sukad sa buwan sa Enero, mas ubos sa 516 ka kaso sa susamang period sa miaging tuig.

Matud ni Macasucol nga pabiling nag-una ang barangay Camputhaw sa labing daghan og kaso sa dengue sa 80 ka mga barangay sa dakbayan.

Kini giingon sa dengue coordinator nga gisundan sa barangay Labangon, Tisa, Guadalupe, Carreta ug barangay Lorega San Miguel. - Elly Bolonos (BANAT NEWS)