CEBU, Philippines - Sama ni acting Mayor Mike Rama, si Bokal Juan Bolo wala usab maka-uyon sa bag-ong commercial ni Edu Manzano sa LBC television.
Nagtuo si Bolo nga ang maong TV commercial makahatag og kalibog ngadto sa mga kabataan ilabi na sa mga nagtungha sa elementarya.
Nasayran nga sa maong TV commercial, si Mansano mipa-spelling sa bata nga tinun-an sa pulong nga “remittance” apan ang tubag sa bata “LBC” ug niingon si Manzano og “tumpak.”
Suma pa ni Bolo nga ang maong commercial nga kanunay nga makita sa mga bata sa telebisyon naghatag og usa ka sayop nga impormasyon ug mahatag og kalibog ngadto sa mga tinun-an.
Samtang segon sa report si Rama buot nga ang Kapisanan ng mga Brodkaster ng Pilipinas (KBP) mohimo og lakang aron wagtangon ang TV commercial. Si Bolo sa iyang bahin nanawagan ngadto sa Department of Trade and Industry (DTI) nga instriktuhon ang pag-monitor sa mga script sa commercial ni Mansano ug sa tanan nga mga commercial pagseguro nga ang mensahe nga gipalanog dili makalibog sa mga kabataan nga moresulta sa pagkat-on og sayop nga inpormasyon.
Ang maong resolusyon gipaabot nga mapasar karong hapon atol sa senemanang sesyon sa mga sakop sa hunta probinsiyal.
Ang mga sakop sa hunta probinsiyal mohatag unya og kopya sa maong resolusyon ngadto sa labaw nga opisyal sa DTI Manila aron makahimo dayon kini og tukmang lakang. - Chester Abadilla (BANAT NEWS)