CEBU, Philippines – Usa ka tawo nga wala hiilhi kay nagtaptap sa iyang dagway nakadala og P6 mil gikan sa usa ka Burger Machine (BM) nga iyang gitulis sa highway Pusok, dakbayan sa Lapulapu sa miaging kadlawon.
Ang biktima mao si Resmel Taneo Jr. 24, dalaga nga taga Sta. Maria, Pusok, dakbayan sa Lapulapu, usa ka cashier sa BM.
Si SPO1 Danilo Aying sa Lapulapu Police Station mibutyag sa Banat News samtang nagbantay sa tindahan ang biktima, kalit lang mitunga ang usa ka tawo nga nagtaptap sa nawong unya mideklarar dayon kini nga tulis uban sa pagtion sa iyang armas de fuego ngadto kaniya.
Si Taneo nga nagkurog sa kahadlok, basin nga patyon siya wala pa raba siya maminyo, napugos sa paghatag ngadto sa tulisan sa P3 mil nga halin sa tindahan ug sa laing P3 mil nga kaugalingon niyang kuwarta.
Human madawat ang kuwarta, misirit dayon pahilayo ang tulisan, samtang si Taneo misumbong usab dayon sa kapolisan nga diha ra sa duol sa gibantayan niyang BM.
Apan pag-adto pa sa mga polis, bisan anino nalang sa tulisan, wala gyud silay nakita. - Bong Soriano (BANAT NEWS)