Opisyal sa MCC ipasuspenso

CEBU, Philippines – Ang mga opisyal ug kawani sa Mandaue City College miawhag sa Ombudsman Visayas nga ipaubos sa preventive suspension ang tanang mga opisyales sa dakbayan sa Mandaue tungod sa pagdumili sa paghatag sa ilang sweldo.

Ang kontrobersiyal nga presidente sa Mandaue City College nga si Paulus Cañete, mga kawani ug magtutudlo sa maong tunghaan misulat og reklamo ngadto kang deputy Ombudsman for the Visayas Pelagio Apostol nga ipaubos sa 90 ka adlaw nga preventive suspension sila si Mayor Jonas Cortes, Vice Mayor Carlo Fortuna ug ang tanang mga konsehal sa dakbayan sa Mandaue.

Matud pa sa ilang reklamo upat na ka tuig nga wala gihatag sa kagamhanan sa dakbayan sa Mandaue ang ilang binulang suholan human napulihan ni Mayor Cortes ang administrasyon sa mga Ouano.

Si Cañete ug mga kaubanan niining magtutudlo mipasangil nga gilapas sa maong mga opisyales ang duha ka city ordinances nga maoy nagmugna sa Mandaue City College.

Nalatid sa section 13 sa  duha gyud ka ordinance nga ang gobiyerno sa Mandaue City gikinahanglan nga mogahin gyud og P5 milyones matag tuig alang sa suhulan sa mga kawani ug sa operasyon sa maong tunghaan.