CEBU, Philippines – Gipaabot sa Cebu City Schools Division nga dunay mahitabong mass exodus sa mga tinun-an gikan sa pribado ngadto sa publikong mga tunghaan sa dakbayan sa umaabot tuig-tingtungha nga gitakdang mobukas karong Hunyo 1.
Kini bisan pa man sa pasalig sa halos tanang pribadong mga tunghaan sa siyudad nga walay ipatumang tuition fee increase sa umaabot nga school year.
“Mag-expect gyud ta ana kay duna may mga ginikanan nga dili na ka-afford bisan sa present rate of tuition fees tungod kay nangawad-an og trabaho, na-close ang ilang gitrabahoan nga pabrika o ang ila mismong negosyo, ingon ana ba,” sumala pa ni City Schools Division Superintendent Lorna Rances.
Nagkanayon hinuon si Rances nga 3.5 porsiyento lang ang ilang napanglantawang increase sa mga tinun-an sa dakbayan.
Miingon si Rances nga sa miaging school year, ang public elementary sa siyudad dunay 94,987 ka mga tinun-an ug 46,385 usab ka mga estudyante sa high school.
Kini nagpasabot nga dul-an lang sa 5 mil ka mga tinun-an sa elementarya ug high school sa dakbayan ang madugang sa umaabot nga tuig-tingtungha.
Gipadayag hinoon ni Rances nga ang nahisgutang gidaghanon ila nang gipangandaman ug gipangitaan na karon og solusyon. - Elly Bolonos (BANAT NEWS)