CEBU, Philippines – Si Konsehal Bernard Odilao sa dakbayan sa Talisay kinsa maoy tsirman sa komitiba sa kalikupan dakong supak sa pag-ban o pagdili sa paggamit sa mga plastic bag.
Kini tungod kay matud pa niya seguradong maapektohan ang industriya ug mapagan ang panginabuhi sa mga nanarbaho sa maong industriya.
Matud pa ni Odilao nga dili angayang i-ban ang maong produkto, kundili ang angayang buhaton sa gobyerno mao ang pag-kontrolar sa paggamit niini.
Giangkon ni Odilao nga ang plastic makadaot gyud sa kalikopan, ilabi na kun kini dauban o kaha ipataka lang og labay sa publiko.
Gipasabot niya nga kun kini daoban makasamot kini pagguba sa ozone layer sa kawanangan ug makadaot sa panglawas sa tawo nga mahanggap sa baho sa kemikal niini, samtang kun ipatuyang kini sa paglabay, dako kaayo og ikadaot sa mga imbornal kay makapabara kini sa tubig tungod kay dili man madugta nga moresulta sa mga lunop.
Si Odilao nagkanayon nga ang kinahanglan mao ang pagdesiplina sa tanang katawhan nga mogamit niining produktoha pinaagi sa pag-edukar kanila bahin sa maayo ug dili maayong resulta sa paggamit og plastic.
Ang maong pamahayag ni Odilao nahimo dihang nadungog niya nga may resolusyon ang konseho sa dakbayan sa Sugbo nga nagdili sa paggamit sa plastic nga bag.
Alang kang Odilao dili local nga kagamhanan ang may gahum sa pagpatuman og balaod bahin sa pagdili sa paggamit sa bag nga plastic, kundi ang Kongreso. - Brenda D. Batuto (BANAT NEWS)