CEBU, Philippines – Nagtingkagol sa karsel sa Santa Fe Police Station ang usa ka Amerikanong usa ka producer sa Hollywood human giingong gidakop tungod sa pagdala-dala sa usa ka 12-anyos nga dalagita samtang nagsuroy-suroy sa maong lungsod.
Ang 41-anyos nga langyaw (pangalan gipugngan sa Banat News) kasamtangang nagpuyo sa Huyuhoy Beach Resort sa barangay Talisay sa naasoy’ng lungsod.
Ang Department of Social Welfare and Development maoy giingong nangusog sa pagpasaka og kaso batok sa maong langyaw gumikan sa paglapas sa Republic Act 7610, Article 6, Section 10 paragraph B.
Ang maong balaod nagdili sa mga langyaw nga magdala-dala o makigkuyog-kuyog og batang Filipino nga wala ang mga ginikanan sa naulahi.
Apan ang maong langyaw gikatahong kusganong mihimakak nga duna kini dautang tuyo sa bata ug wala usab siya masayod kabahin sa maong balaod gawas lang sa kasayurang gidili dinhi sa nasud ang human trafficking.
Si PO1 Wenceslao Daban sa Santa Fe Police Station nagkanayon sa pakighinabi sa Banat News nga dunay mga concerned citizen nga misumbong kabahin sa maong langyaw nga nagsuroy-suroy sa maong lungsod.
Hinungdan nga ang kapolisan sa Santa Fe nga gipanguluhan ni PO3 Shiela Ilustrisimo inubanan sa DSWD head nga si Alpamina Saagundo miduaw sa nahimutangan sa maong langyaw niadtong Mayo 14 ug naabtan ang maong bata nga uban sa maong langyaw.
Ang maong bata gikuha sa taga DSWD ug dihang gipangutana kabahin sa iyang pakigkuyog sa maong langyaw kini mitug-an nga walay dautang gibuhat kaniya ang naulahi ug igo ra silang naglaag-laag sa dapit.
Nianang pagkasunod adlaw boluntaryong miadto sa Santa Fe Police Station ang suspek aron mangutana kung unsay iyang nahimong kalapasan.
Ang mismong mga ginikanan sa bata nga mao pa usab ang pag-abot miesplikar sa kapolisan ug sa DSWD nga dugay na nilang kaila ug higala ang maong langyaw.
Ang mga ginikanan mipasabot nga gikatakda unta silang mag-uban sa maong langyaw aron mosuroy sa maong lungsod apan gumikan sa mga kakulian gipauna nalang nila ang duha.
Matud pa ni Daban nga wala magtuo ang maong langyaw nga kalapasan diay dinhi sa Pilipinas ang pakigkuyog sa usa ka menor de edad nga walay kaubang ginikanan sa bata.
Mipasabot usab kini nga tuyo lang niyang tabangan ang maong bata ug aron kini malingaw.
Ang kaso ipasaka sa DSWD ugmang adlawa samtang ang bata kasamtangan pa karun nga anaa sa ilang kostudiya. - Lesley Caminade (BANAT NEWS)