CEBU, Philippines – Gipanglarot sa kapulisan ang mga punoan sa marijuana nga hapit na anihon nga ilang nadiskubrehan sa bukirang bahin sa sitio Buyo barangay Captain Claudio siyudad sa Toledo niadtong Miyerkules sa alas 5:30 sa buntag.
Ang hepe sa kapulisan sa Toledo Supt. Julian Entoma kauban sila si PO3 Eliseo Paquit Jr, PO3 Benidecto Bobilles, PO2 Dante Hilo ug PO2 Roxam Enerio maoy mihimo sa operasyon human makadawat og impormasyon sa maong plantasyon sa marijuana.
Matud pa ni PO2 Roxam Enerio sa Toledo City Police dihang nahinabi sa Banat News 170 ka dagkung punoan sa marijuana nga anihunon na ang ilang nalarot atol sa gihimo nilang operasyon.
Usa ka gihinganlan og Bergido Allecer nga nagpuyo sa nahisgutang lugar maoy gitumbok nga tag-iya sa maong plantasyon sa marijuana apan nakabantay ang suspek dihang nagpaingon na sila sa lugar ug daling nakasibat paingon sa bukirang bahin sa maong siyudad.
Ang maong mga punoan sa marijuana kasamtangang gideposito sa estasyonan sa kapulisan samtang nagpaabot sa kamanduan sa Cebu Provincial Police Office (CPPO). - Darrel Carumba (BANAT NEWS)