Kawani giseminar bahin sa H1N1

CEBU, Philippines – Mga kawani sa city hall sa dakbayan sa Talisay ang gipaubos og seminar kabahin sa AH1N1 virus o swine flu aron ma-edukar sila niini ug mawagtang ang ilang mga sayop nga pagtuo ug makahibawo sila sa mga precautionary measures ingon man mapaambit usab nila ngadto sa uban ang ilang mga nakat-onan.

Lakip sa mga gipaubos sa seminar ang mga lider sa mga batan-on nga unang batch sa mi-summer job.

Si Talisay City Administrator Richel Bacaltos sa pakighinabi niini sa Banat News kagahapon nagkanayon nga niadtong Martes ug Miyerkules gipahigayon ang seminar ni Talisay City Health Officer Dr. Lino Alanzado.

Matud ni Bacaltos nga nabaniog karon ang swine flu ug dili malikayan nga daghan ang gibati og kabalaka ug ang kasagaran ang dunay mga sayop nga pagtuo kabahin sa maong virus.

Tumong sa siyudad nga makatap ang saktong impormasyon ngadto sa publiko ug ang mga precautionary measures sa paglikay sa maong makamatay nga virus. Si Bacaltos midugang nga lakip sa gituki sa seminar ang data sa swine flu ug ang mga nasud nga apektado.

Ang mga nahisgutang lider sa mga mi-summer job kinsa napaubos sa seminar ang gitahasan sa siyudad sa pag-apod-apod og mga impormasyon kabahin sa swine flu ug sa mga precautionary measures niini. - Brenda Batuto (BANAT NEWS)