Bolo: Dili tuohan swine flu messages

CEBU, Philippines – Giawhag karon ni Bokal Juan Bolo ang katawhan nga dili motuo sa gipakatap karon nga mga text messages nga nakasulod na dinhi sa lalawigan sa Sugbu ang makahadlok nga influenza A(H1N1) kon swine flu virus nga mikalas na og ubay-ubay nga kinabuhi didto sa Mexico, Estados Unidos ug ubang nasud sa Uropa.

 Matud pa ni Bolo nga ang mga Sugbuanon dili angayan nga magpadala sa mga gipakatap karon nga mga text messages nga may mga pasyente sa Vicente Sotto Memorial Medical Center nga natakbuyan sa maong virus.

 Sumala pa ni Bolo nga ang Department of Health (DOH) lamang ang otorisadong mosulti kun nakasulod na ba ang maong virus dinhi sa Sugbu ug dili ang ni bisan kinsa.

 Si Bolo miingon nga ang DOH nipasidaan daan nga mutumaw ang nagkadaiyang sakit karong panahon sa ting-ulan ilabina sa hilanat, ubo nga posibling sintoma sa dengue ug ubang matang sa sakit.

 Apan gitataw niini nga dili dayon motumbok ang katawhan nga gihambin nga sakit sa mga bata niini sintoma sa sakit nga swine flu virus.

 Sigon sa kasayoran gikan sa DOH may unom pa mga kaso sa suspected nga carrier sa swine flu virus   gikan sa mga nasud nga may kaso sa maong sakit ug may hilanat kini sa pag-abot sa Mactan Cebu International Airport apan napamatud-an nga negatibo ang resulta sa eksaminasyon. - Chester Abadilla (BANAT NEWS)