Polis gitudlong masiao operator

CEBU, Philippines – Duha ka gipasanginlang runner sa illegal nga sugal nga masyaw ang nadakpan sa mga sakop sa Provincial Intelligence Branch (PIB) sa Cebu Provincial Police Office (CPPO) sa miaging gabii didto sa luyo nga bahin sa simbahan sa Romano Katoliko sa lungsod sa Catmon.

Apan ang usa sa duha ka dinakpan mitudlo sa usa ka polis nga nadestino sa Regional Health Services nga nahimutang sa Camp Sotero Cabahug nga maoy iyang pinanser sa masyaw ug nagpadagan sa tulo ka mga lungsod sa amihanang bahin sa lalawigan sa Sugbu.

Si Chief Insp. Maria Elma Delos Santos, hepe sa PIB miila sa dinakpan nga sila si Ramir Anciano, 50, taga Cogon lungsod sa Bogo ug Alfredo Mauricio nga taga barangay Poblacion sa lungsod sa Sogod.

Nakuha nga mga ebidensya ang masyaw tally sheets nga dunay nagkalain-laing kombinasyon nga numero ug kuwartang nagkantidad og 1,731 nga gituohang halin sa maong sugal.

Laing nakuha gikan sa posesyon ni Anciano mao ang PNP Identification Card sa polis nga maoy gitumbok niining maoy iyang pinanser (ngalan sa maong polis gipugngan una sa Banat News).

Matud ni Delos Santos nga nakadawat sila’g reports nga si Anciano maoy sinaligan sa maong polis isip kolektor sa tally sheets sa lungsod sa Sogod, Carmen, Catmon.

Si Anciano sa wala masayring hinungdan human motug-an sa kalihukan sa maong polis, daling mibakwi sa nahaunang pamahayag ug miingon nga di na niya pinanser ang maong polis.

Matud pa niya kaniadto ra kini (polis) nag-finance og masyaw apan nabangkarota ug gitugyan nalang ang mga tawo ngadto sa usa ka ginganlan og Nesiterio “Nesing” Melandres nga taga Cogon, Bogo nga giingong igsuon sa barangay kapitan sa Pulangbato sa maong lungsod.

Si Melandres nadakpan niadtong bulan sa Nobiyembre sa kapolisan sa susama gihapong kalapasan apan nakapiyansa kini og kapin sa usa ka gatos ka libo.

Sa pagkakaron wala pay direktang ebidensyang nagtumbok sa maong polis sa kalambigitan sa maong gambling operation maong dili pa nila maapil sa pagpasaka og kaso. - Rey Pasaporte uban sa report ni Lesley Caminade (BANAT NEWS)