'Hired killer' na-entrap

CEBU, Philippines – Usa ka gipasanginlang hired killer ang gidakop sa Investigation and Detection Management Branch sa Cebu City Police Office human sa gipahigayong entrapment operation niadtong miaging hapon sulod sa usa ka fast food chain sa Fuente Osmeña.

Ang gikatahong hired killer nailhang si Marcelino Lumaad Paña Jr., taga Sto. Niño, Lower Casili, lungsod sa Consolacion.

Si Marry Ann Debon midangop sa IDMB niadtong Mayo 8 aron magpakitabang sa kapolisan kabahin sa iyang nadawat nga sulat nga nagkanayon nga gipasanginlan siyang mi-hire og tawo aron ipapatay ang iyang banang si Peter Debon usa ka Dutch national ug sa bag-o niining kapuyo nga si Virginia Comaya sa kantidad nga P60 mil.

Si Marry Ann kusganong mihimakak nga duna siya’y dautang plano sa duha hinungdan nga nabalaka kining kung dunay mahitabo kanila siya unya maoy pasanginlan maong midangop siya sa kapolisan.

Ang maong suwat gikatahong gikan sa gun for hire nga si Paña nga naghisgut sa ilang kasabutan kung pila maoy bayad sa pagpapatay sa duha, ang maong suwat may gibutang nga contact number niini.

Human modangop sa IDMB, si Sr. Insp. George Ylanan mitambag kang Marry Ann nga pasakyan-sakyan lang ang maong gun for hire pinaagi sa pakig-contact kaniya.

Gikatahong misugot ang suspek sa transaksyon ni Marry Ann ug mimando sa naulahi nga magkita silang duha sa usa ka fast food chain diha sa Fuente Osmeña alang sa bayad.

Una pa moadto sa maong kan-anan si Marry Ann gipahibalo niini ang maong transaksyong mahitabo sa IDMB hinungdan nga giandam dayon ang entrapment operation.

Wala hinuoy natigayong binayranay gumikan kay pag-abot sa maong lugar igo rang gipakumpirmar kung mao ba gyud kini ang tawong gika-text ni Marry Ann base usab sa paghulagway niini sa text sa iyang suoton.

Si Paña sa pakighinabi sa Banat News kusganong mihimakak nga siya maoy mipadala og suwat kang Marry Ann ug mihimakak nga usa siya ka gun-for hire.

Matud pa niya nga ang iyang nahimong sayop mao ra ang pagdawat sa usa ka simpack nga hinatag sa usa ka bata dihang nagpabulkit siya og ligid atubangan sa panimalay nga gipuy-an sa bana ni Marry Ann ug sa gikatahong kapuyo niini nga si Virgie.

Giangkon hinuon niyang iyahang gisakyan ang text ni Marry Ann tungod usab sa panginahanglan niya og kwarta.

Bisan si Marry Ann sa pakighinabi sa Banat News nagdudang si Paña gyud ang mihimo sa maong sulat. Nagduda siyang hinimo-himo ra kini ni Virginia Comaya ug gituohang nangwarta ra kini sa iyang bana.

Si Marry Ann ug si Paña dugay nang managkaila ug gani gipautang pa kini sa babaye og P5 mil.

Ang kapolisan misubay pa sa kamatuuran sa maong mga alegasyon gumikan kay mismo ang pamahayag ni Paña wala magkadimao.

Gipasakaan na karun og kasong Robbery with Extortion ang gikatahong hired killer ug nagtingkagol na kini sa karsel sa Cebu City Police Office. - Lesley Caminade (BANAT NEWS)