78IB gibalhig division, apan seguridad sa Sugbu di apektado

CEBU, Philippines – Pormal nang gibalhin og unit ang 78th Infantry Battalion nga nagbase sa sitio Imaculada, sa barangay Nangka, Balamban gikan sa 3rd Infantry Division ngadto na sa 8th ID atol sa gihimong seremonyas niadtong Miyerkules sa ilang kampo.

Si Major General Arthur Tabaquero maoy pormal nga mipaabot sa maong pahibalo ngadto sa Battalion Commander sa 78th IB nga si Lt.Col. Raymundo Bañares.

Matud pa ni Tabaquero igo lang gi-swap ang maong batalyon sa 62nd IB sa 8th ID nga gibalhin usab karon sa 3rd ID.

Samtang gipasalig ni Tabaquero nga dili ibalhin ang maong batalyon sa ubang dapit gumikan kay maayo ang performance niini sulod sa pipila na ka mga buwan ilawom sa pagdumala ni Bañares.

Gani gidayeg niini si Bañares ug ang kinatibuk-ang tropa sa 78th IB tungod kay bisan usa ka buto sa armas walay nadungog apan daghang mga armas ug mga rebeldeng lider ang nangadakpan.

Duna say mga armas nga boluntaryong gitahan ngadto kanila gumikan sa programang “Balik Baril Program” ug sa ayuda gikan sa local government units aron sila makasugod og balik sa normal nga kinabuhi.

Atol sa pagbisita ni Tabaquero dunay gipahigayong ceremonial tree planting sa mga opisyal sa 8th ID ug 78th IB.

Sa pakighinabi sa Banat News kang Bañares kini mitug-an nga kabahin na gyud kini sa seremonyas sa AFP ang pagtanom og kahoy matag dunay mobisitang mga labaw.

Lakip sa mipakita sa maong kalihukan ang mayor sa Balamban nga si Mayor Alex Binghay ug ang iyang kapikas.

Upat ka mga sundalo usab ang gipasidunggan ug gihatagan og medalya nga sila si First Lieutenant Roy Dalumpines, First Lieutenant Michael Madayag, Sgt. Joely Bert Baron ug Sgt. Reynor Ruiz. - Lovers Lyn, Yangyang uban sa report ni Genevieve Dolino (BANAT NEWS)