CEBU, Philippines – Gipanghimakak ni acting Vice Mayor Alan Bucao sa dakbayan sa Talisay ang mga pasangil nga mag-agad pa sa iyang pagtugot ang mga solicitation letter sa mga tawong gustong manolisit og hinabang diha sa mga buhatang pribado ug iya sa gobyerno sa dakbayan sa Talisay.
Si Bucao mibutyag sa Banat News kagahapon nga nahingangha siya niining butanga tungod kay alang kaniya ang pagpanolisit o pagpangayo og hinabang katungod na kana sa usa ka tawo o grupong ganahan sa pagpangayo og tabang ug wala nay labot ang bise mayor niana.
Wala hinuon magduda si Bucao nga giduhig na usab sa pinolitikang paagi ang iyang ngalan bahin ning maong isyu.
Apan ang nakapasabot niining butanga mao si konsehal Bernard Odilao kinsa nagkanayon nga ila kining kinaugalingong gusto kay dili sila gustong may manolisit nga mangilad lang.
Miingon si Odilao nga nauyonan nila sa miaging semana nga maayong eskreningon una sa vice mayor ang mga solicitor kung tinarong ba ang ilang pagpanolicit .
May gibasihan usab si Odilao niining isyuha ,sanglit sa miaging mga tuig, may mga nadiskobrehan silang mga binuang niining mga solicitation ug gani ang usa sa mga nabiktima mao si Vice Mayor on leave Lani Abarquez.
Apan miuyon si Odilao nga dili usab maayo nga kining mga butang nga pribado itahas pa ngadto sa bise mayor kay wala naman kini labot sa iyang trabaho.
Gani ang mga tigpaniid nagkanayon nga ang angay nilang pa-imbistigahon o kaha paaprobahon sa mga solicitation letter mao ang hepe sa kapolisan diha sa maong dakbayan.
May mga nagkanayon nga dili na angayan pang hasulon ang bise mayor niining mga butanga kay wala na kini labot sa iyang tahas. – BANAT NEWS