CEBU, Philippines – Nahabwa ang tinai sa usa ka tawo human kini dunggaba sa iyang silingan nga iyang gikasinumbagay didto sa sitio Cadulang sa barangay Agus, dakbayan sa Lapulapu, sa miaging gabii.
Ang biktima mao si Christopher Gerbolingo Alpahara, 30, ulitawo, samtang ang suspetsado giila usab sa kapolisan nga mao si Eutemio Ombena, 19, ug pulos taga Cadulang.
Si PO1 John Philip Silmaro sa homicide section sa Lapulapu Police Station mibutyag sa Banat News nga hubog ang biktima nga nagpaingon nang mouli sa ilang balay.
Apan sa iyang pag-agi sa dapit nga gilingkoran sa suspetsado kalit kunong nasuko ang maong suspek ug diretsong gituok sa liog ang biktima.
Si Alpahara kinsa nakahigayon sa paglit-ad ug pagkisikisi, nakalingkawas sa kamot sa suspek, ug misukol siya og sinumbagay sa mipitlok kaniya.
Apan dihang nalupig ang suspetsado, mikuha kini og kutsilyo ug gihansakan ang tiyan sa biktima nga maoy hinungdan sa pagkahabwa sa tina-i niini.
Ang biktima gihatod dayon ngadto sa Lapulapu District Hospital apan gumikan sa katalandugon sa iyang kahimtang, gibalhin dayon kini ngadto sa Vicente Sotto Memorial Medical Center sa dakbayan sa Sugbu.
Samtang ang suspetsado kinsa mitahan sa iyang kaugalingon sa kapolisan sa pagkakaron gitanggong na sa bilanggoan. - Romeo T. Limpangog (BANAT NEWS)