Multicab sa barangay natagak

CEBU, Philippines – Puwerting pagkagusbata sa multicab nga gipanag-iya sa barangay Tapul dihang naligid kini sa bakilid kay nawad-an og preno didto sa sitio Purok I, sa nahisgutang barangay kagahapon sa buntag.

Si konsehal Paquito Elemon sa Tapul kinsa maoy nagdrayeb sa maong sakyanan nagpasalamat kay wala siya maunsa bisan didto siya sulod sa sakyanan nga nabalintong ug misaliring sa giladmong 30 metros nga lupot.

Si Kapitan Jose Juarez sa Tapul mibutyag sa Banat News kagahapon nga mangita pa siya og kuwarta nga ikabayad sa pagpaayo sa maong sakyanan.

Miingon si Juarez nga gisakyan ni Elemon ang multicab kay gipatobilan kini og gasoline dihang nawad-an kini og preno. - Brenda D. Batuto (BANAT NEWS)