3 ka mayor mohangyong IRA di una kuhaan

CEBU, Philippines – Nagkasabot sila si Governor Gwendolyn Garcia ug ang tulo ka mga mayor sa mga siyudad nga gibalik sa pagkalungsod nga hangyuon si Presidente Gloria Macapagal Arroyo nga dili lang hilabtan ang pag-release sa Internal Revenue Allotment kon IRA share hangtud na mapupos ang tuig 2009.

Nagtigum sila si Garcia, Naga City Mayor Valdemar Chiong, Carcar City Mayor Patrick Barcenas ug Bogo Mayor Celestino Junie Martinez lakip na mga regional directors sa Department of Interior on Local Government kon DILG, Civil Service Commission ug Department of Budget , Management kon DBM ug ang Vice President sa Development Bank of the Philippines aron tukion ang maong hangyo.

Sumala pa ni Garcia kinahanglang respetuhon ang napasar nang budget proposal sa maong mga dapit alang karong tuiga tungod kay ang maapektahan niini mao ang serbisyo sa publiko.

Ang maong tulo ka mayor lakip na ang uban pang 13 ka mga lungsod moduso sa ikatulong motion for reconsideration ngadto sa Korte Suprema nga usbon ang nahaunang desisyon nga nagbasura sa balaod nga naghimo sa 16 ka lungsod ngadto na sa pagka-syudad.

Mas dako ang napasar nga budget proposal sa tuig 2009 nga kuhaon gikan sa internal revenue allotment (IRA) share kung itandi sa naandan nilang mga shares dihang mga lungsod pa sila.

Ug kung tungod sa kamandoan sa Korte Suprema pagpabalik kanila sa pagkalungsod nga makaingon sa pag-ubos usab sa ilang IRA shares dako kini og epekto sa ilang mga programa karong tuiga.

Kini tungod kay nakasugod na sila og utang sa bangko alang sa pagtukod sa dagkong proyekto sama sa city hall, merkado ug terminal projects.

Si Garcia nanghinaot nga kung tugutan sa pangulo sa nasud ang manifesto sa mga mayor di na unya mabalaka ang maong mga lider sa pagpatuman sa ilang mga proyekto karong tuiga.

Sa iyang bahin, si Bogo mayor Martinez miingon nga nangandam na sila pagkabalik sa siyudad ngadto sa pagkalungsod pinaagi sa pagminus sa gastuhan og mga proyekto.

Sila si Chiong ug Barcenas miangkong maguba gyud ang ilang budget karong tuiga kun mogamay na ang ilang IRA hinungdan nga nagpatabang sila sa gobernador.

Si Garcia nipasalig hinuon nga ang probinsiya andam nga mopahulam pinaagi sa DBP og pundo alang sa maong mga lungsod ug malaumon usab siyang motabang si Arroyo.

Samtang si Civil Service regional director Judy Chicano miingon nga suportahan nila ang lakang ni Garcia nga ipatuman nga status quo sa pag-release sa IRA sa Naga, Carcar ug Bogo hangtud sa Disyembre.

Gipasabot niini nga kun hingpit nga ipatuman ang desisyon sa Korte Suprema karong tuiga, maapil gyud niini ang isyu kabahin sa IRA shares.

Samtang ang mga bag-ong nadawat nga kawani matangtang nga walay benepisyo ug dili makapasaka og kaso ug kadtong na-promote ug gipatas-a’g suweldo mahibalik usab sa naandang posisyon ug suhulan.

Si DILG-7 regional director Noval misuporta usab siya sa lakang sa gobernador samtang si DBM regional director Carmen Fernan nidason usab sa baruganan sa gobernador tungod kay sigurado siyang may mga proyekto nga dili na mapatuman kun minus na ang IRA sa tulo ka dakbayan. – BANAT NEWS