16-anyos gipusil, mi-eskapo sa VSMMC

CEBU, Philippines – Mi-eskapo sa Vicente Sotto Memorial Medical Center (VSMMC) ang usa ka minor de edad nga biktima sa pagpamusil sa Sitio Bildohan barangay Omapad dakbayan sa Mandaue sa milabay'ng gabii.

Matud pa ni PO3 Rommel Lim sa Lapulapu City Police Office nasuta nga sa ilang gihimong pag-follow up sa nahitabong pagpamusil sa usa ka 16-anyos nga lalaki pipila ka mga nakakita mipadayag nga sa milabay’ng adlaw ang minor de edad giduaw sa iyang amahan apan kalit lang nga nahanaw sa maong tambalanan.

Gumikan niini gisubay ni PO3 Lim ang mga tawo sa dapit nga gipuy-an sa biktima apan kini mipahibalo nga gidala sa amahan ang iyang anak ngadto sa lungsod sa Lilo-an ug sa ilang pagsusi sa maong dapit negatibo kini sa maong dapit.

Matud pa ni Lim wala pa ma-operahi ang bala nga anaa sulod sa lawas sa 16 anyos nga biktima sa pagpamusil sa ila ra usab nga dapit.

Kahinumduman nga ang 16 anyos kalit kining gipusil sa tulo ka mga tawo sa milabay'ng adlaw didto sa sitio Bildohan, barangay Omapad, dakbayan sa Mandaue diin posibleng pagdumot ang motibo sa maong pagpamusil gumikan kay siya ra ang gipusil ug wala hilabti ang duha niini ka higala nga kuyog atol sa maong panghitabo. - Bong Soriano (BANAT NEWS)