CEBU, Philippines – Duha ka lalaki gikonbikto sa korte sa kasong murder tungod sa pagtigbas patay sa silingan nga uyoan sa usa ka suspetsado didto sa sitio Langob, barangay Sirao dakbayan sa Sugbo niadtong Mayo 16, 2004.
Ang duha ka konbiktado nailhan nga sila si Jovelito Bontilao ug Junnel Gualiza nga taga Langub, Sirao ning siyudad sa Sugbo.
Sumala sa record sa korte, yuta ang hinungdan sa pagpatay sa biktima nga si Danilo "Opao" Bontilao niadtong Mayo 16, 2004 alas 7 sa buntag sa veranda sa balay sa iyang inahan sa Langub, Sirao siyudad sa Sugbo.
Si Regional Trial Court (RTC) Branch 18 Judge Gilbert Moises nagtug-an sa iyang pito ka pahina nga desisyon nga napamatud-ang sad-an sila si Jovelito ug Gualiza pagtigbas patay kang Danilo nga uyoan ni Jovelito kuyog sa laing suspetsado nga si Elvin Bontilao kinsa nagtagotago hangtod karon.
Si Judge Moises mihatag og gibug-aton sa pamahayag sa testigos sa prosekusyon nga si Romulo Bontilao, 32, igsuon sa biktima ug asawa niini nga si Rosalina kinsa miingon nga mga alas 7 sa buntag sa Mayo 16, 2004 miabot sa ilang balay si Jovelito uban nilang Gualiza ug Elvin nga nangita sa biktima nga si Danilo aron sunahon sa problema sa yuta.
Sa dihang gitudloan sa nahimutangan ni Danilo didto sa balay sa ilang inahan, ang mga suspetsado miadto dayon sa biktima nga naglingkod sa veranda. Si Jovelito miduol kang Danilo apan kalit lamang kini miibot sa gidala niining sundang ug dayong tigbas kang Danilo ug miapil usab og tigbas ang laing duha ka mga kauban hinungdan sa hinanaling kamatayon sa biktima.
Si Judge Moises mipahamtang og silot nga reclusion perpetua kung pagkabilanggo sa tibuok kinabuhi batok sa duha ka mga akusado. Pabayron usab sila og P75 mil alang sa civil indemnities, P50 mil para sa moral damages, P25 mil alang sa temporate damages ug P25 mil isip exemplary damages. - Genevieve F. Dolino (BANAT NEWS)