CEBU, Philippines – Nabali ang liog ug miliki ang ulo ug namatay ang usa ka habal habal drayber human kini magkabangga sa laing motorsiklo didto sa barangay Bulak, lungsod sa Dumanjug niadtong Lunes sa alas 7 sa gabii.
Samtang ang laing habal- habal drayber nga gikabangga niini anaa usab sa kritikal nga kahimtang ingon man ang usa ka 18 anyos nga pasahero niini sulod sa tambalanan dinhi sa dakbayan sa Sugbo.
Ang dead on arrival sa Vicente Sotto Memorial Medical Center (VSMMC) mao si Adolfo Bauson, 27, ulitawo, molupyo sa barangay Pawa sakop sa nahisgutang lungsod ug usa ka habal-habal drayber.
Samtang ang laing habal- habal drayber nga gikabangga niini nga anaa usab sa talandugon nga kahimtang mao si Romeo Pelomino, nagpuyo gihapon sa maong lugar ug pasahero niini nga si Dexter Isolana, 18, ulitawo.
Matud ni SPO1 Ceriaco Luab sa Dumanjug Police Station sa dihang nahinabi sa Banat News subay sa blotter nga gibasehan niini ang habal- habal nga motorsiklo Honda XRM nga gimaneho ni Bauson gikan kini sa barangay Bulak ug paingon na untang mopauli sa barangay Pawa.
Samtang ang laing motorsiklo nga gimaneho ni Pelomino gikan kini sa pikas nga direksyon ug nagpasugat sa maong lugar apan tungod sa kakusog sa ilang pagpadagan aksidenting nagkabangga pag-abot sa maong lugar.
Matud sa mga nakasaksi pulos nalabay gikan sa ilang gisakyan nga mga motor ang duha ka drayber sa motor apil na ang pasahero niini apan matod sa nakasaksi si Bauson maoy na-grabehan og maayo human mag-una ang ulo niini pagtugpa sa semento nga karsada nga maayong pagkapantok. - Darrel A. Carumba (BANAT NEWS)