Nanisko gikulata ug gidunggab

CEBU, Philippines – Usa ka lalaki kinsa gikasuyaan, gikulata ug gidunggab sa barkada sa iyang silingan sulod sa diskohan didto sa barangay Dayhagon, Medillen kagahapon sa ala 1:45 sa kaadlawon.

Ang biktima nga nalubaan sa bukobuko mao si Romeo Jagdon Pilapil Jr., 20 anyos, ulitawo, nga taga barangay Don Pedro Rodriquez, siyudad sa Bogo, samtang ang suspek mao si Elmer Flores nga silingan ra usab sa biktima.

Nasayran gikan sa kapolisan nga nanisko ang biktima kauban sa barkada niini atol sa piyesta sa maong lugar dihang pagkuha niini og babaye nga isayaw unta niya kalit siyang gisumbag sa suspetsado ug pagkatumba niya sa yuta giluba usab dayon ang iyang bukobuko sa ginganlan og Sherwin nga barkada sa suspek.

Hinuon wala na siya kausbi og dunggab kay misirit dayon og panagan ang grupo sa suspek, samtang ang biktima nadala usab dayon sa tambalanan. - Darrel A. Carumba (BANAT NEWS)