'So far, so good'- Arroyo, AH1N1 virus wa pa dinhi

CEBU, Philippines – Gihulagway ni Presidente Gloria Macapagal Arroyo nga ang hugot nga pagbantay sa mosulod ug mogawas sa nasud maoy usa sa mga yawe alang sa pagpakgang nga makasulod dinhi sa Pilipinas ang A(H1N1) virus kun swine flu virus.

“So far, so good,” padayag pa ni Arroyo kagahapon sa mga tigbalita atol sa usa ka press conference samtang mitambong sa mga opisyal nga kalihukan diha sa dakbayan sa Lapulapu kagahapon.

Si Arroyo nagkanayon nga ang nasud miimplementar sa susamang pagpangandam kaniadto dihang mikatap ang makamatay usab nga Severe Acute Respiratory Syndrome (SARS) ug ang avian virus influenza (Bird flu) sa ubang kanasuran.

Ang Pilipinas walay natalang bisan usa ka kaso sa susamang sakit nga nga kasulod dinhi gumikan usab sa kahigpit sa pagpaniid ug preparasyon sa nagkadaiyang ahensya sa gobiyerno.

Si DOH secretary Francisco Duque mitug-an sa mga tigbalita kagahapon nga wala pay bisan usa ka kaso sa maong sakit dinhi sa nasud tungod kay mga suspected lang ug nitumaw nga negatibo ang mga nahaunang gidudahang nangatakbuyan.

Kagahapon nakagawas na gikan sa VSMMC ang duha ka batang giobserbahan sa maong sakit human mag-negatibo ang findings nga gihimo kanila.

Ang Sangguniang Panlalawigan dinhi sa Sugbo nagpagawas og duha ka resolusyong nagsuporta sa Department of Health (DOH) pag-reactivate sa Emergency Task Force nga gigamit kaniadto aron gamiton usab batok swine flu ug ingon man resolusyong nag-awhag sa DOH nga mosusi sa mga pribado ug publikong tambalanan kabahin sa pagpangandam.

Si Bokal Victor Maambong nagkanayon nga angayang pangandaman gyud ang pagsulod sa maong sakit kung ugaling moigo kini dinhi.

Ang maong sakit gikatahong nagsugod sa nasud sa Mexico ug mikalas na og kapin 150 ka tawo sa maong nasud ug sa Estados Unidos ug mikatap na usab sa Germany, Italy, United Kingdom,France, New Zealand, Argentina, Brazil, Canada, Austria, Denmark, United States, France, Spain, South Korea, Netherlands, Guatemala, Japan, El Salvador, Panama, Austria, Hongkong, Ireland, Portugal ug Sweden.

Gituuhang motakod kini pinaagi sa airborne transmission ug direct contact sa natakbuyan na niini, maong ang kalimpyo maoy usa sa proteksyon aron di matakdan.

Samtang ang dakbayan sa Sugbu mireklamong kulang sa kooperasyon ang mga tambalanan sa dakbayan sa Sugbu labot sa gihimong pagpangandam batok sa maong sakit.

Si Dr. Nestor Alonso, ang labaw sa gitukod sa city government nga Quick Response Team (Q-Team) miingon nga sa 15 ka mga tambalanang gipangayoan og action plan sa Department of Health (DOH) batok sa swine flu, duha lang niini ang giingong nakaduso.

“Mura man og inig hatod ngadto sa ospital kay suspect sa swine flu, dad-a lang na ninyo sa Vicente Sotto(VSMMC), something like that ba, mao nay ilang attitude karon,” sumala ni Alonso. 

Matud sa ni Alonso gikinahanglang dunay matawag nga referral hospital ang DOH agi og panagana aron dili maapiki ang maong ahensya sa higayon nga magpunsisok diha sa VSMMC ang mga pasyente nga dudahang nataptan sa nahisgutang sakit. - Rey Pasaporte uban sa report nila ni Elly Bolonos ug Genevieve Dolino (BANAT NEWS)