Way kukaluoy nga pamaagi sa City Pound gisaway

CEBU, Philippines – Gisaway sa Humane Society International (HSI) Asia ang paagi nga gisagop sa nasud ilabi na sa Sugbu pagdakop sa libudsuroy nga mga iro.

Ang Pilipinas lakip na sa Sugbu gikataho nga padayon pang nigamit og wire loop pagbitik aron dakpon ang mga stray dogs kun mga irong gipasagdan diha sa kadalanan.

Matud sa manager sa HSI-Asia nga si Rahul Sehgal nga dili tukma ang maong paagi tungod kay kini usa ka sinalbahis nga pagdakop sa mga iro.

“Wire loop is one way of catching but it is an inhumane method of catching dogs, it is cruel,” sumala ni Sehgal dihang nahinabi sa mga tigbalita.

Dunay mga sugyot si Sehgal kung unsa ang hustong paagi pagdakop sa libudsuroy nga mga iro ug kini maoy usa sa iyang ipaambit karong adlawa. Kini atol sa Pound Management Seminar nga pasiugdahan sa kagamhanan sa dakbayan nga anha ipahigayon sa karaang session hall sa provincial capitol. Gipaabot nga motambong sa seminar mao ang mga City veterinarian, dog catcher, municipal agriculturists sa Sugbu ug uban pa. Tumong sa seminar mao ang paghatag og labing awahi nga kalamboan sa pound management ug actual pound management application.

Lakip na niini ang labing maayo ug tawhanong paagi pagpatay sa masikop nga mga iro ug dili ang kasamtangang paagi nga euthanasia.

Sa iyang bahin, giangkon ni City Veterinarian Doctor Alice Utlang nga gikurihian sa Humane Society sa Amerika ang ilang paagi pagdakop sa mga stray dogs sa siyudad.

Kini atol usab sa pagtambong sa City veterinarian sa usa sa mga tigom sa Humane Society didto sa Estados Unidos dili pa lang dugay.

Nagkanayon si Utlang nga sa dili madugay ilang ilisan og (fishing) net ang wire loop nga ilang gigamit pagdakop sa libudsuroyng mga iro sa dakbayan. - Elly Bolonos (BANAT NEWS)