Lawihan festival nagmalampuson

CEBU, Philippines – Nagmalampuson ang gipahigayong Lawihan Festival sa Malaspascua Island sa lungsod sa Daanbantayan kagahapong adlawa.

Matud pa ni Greeg Rubio, tourism officer sa Daabantayan usa ka launching ang nahitabong festival tungod kay “first time”  kini nga gibuhat aron maisip kining identity sa nahisgutang isla.

Dugang pa ni Rubio nga ilang nahuna-hunaan ang maong festival aron mahinumduman sa mga turista ang kaanyag sa maong kalihukan ug ang kaanindot usab sa dagat sa isla.

Ang Lawihan  gikuha gikan sa ngalan sa isda “lawi” nga maoy naghatag og dugang kaanindot sa ilang isla. Ang festival kagahapon  nadungan sa kapistahan diin walo ka contingents  gikan sa Daanbantayan ang miapil sa  contest.

Ang nakaanindot sa maong festival mao ang kalahian sa mga gipangsul-ob  sa mga dancers  nga mga kagamitan sa diving  aron ihulagway sa mga manan-aw nga ilang makit-an sa ilawom sa dagat ang maanindot nga lawi o tresher shark.

Gibase ang maong festival sa karaang pamaagi sa pagpangisda sa mga tawo sa maong isla diin ilang gituohan nga sila giabagan sa ilang patron nga milagroso nga si Birhen delos Desamparados.

Gibanabana usab nga dili kaayo dako ang ilang nagasto sa maong festival tungod kay ang gipanguha nga magtutudlo sa sayaw taga Daanbantayan ra usab. - Lesley Caminade (BANAT NEWS)