Grupo sa mga tulisan gikan sa Mindanao gipabantayan

CEBU, Philippines – Gialarma sa kapulisan sa dakbayan sa Sugbu ang tanang units human gikatahong dunay banggiitang grupo sa mga tulisan gikan sa Mindanao ang nasigpatan dinhi sa Sugbu.

Ang hepe sa kapulisan sa dakbayan sa Sugbu Sr. Supt. Patrocinio Comendador, nagkanayon nga nakadawat sila og impormasyon niadtong nilabay’ng semana kabahin sa grupo.

Gikatahong kabahin sila sa mga tulisang nanulis sa Fooda Savers Mart diha sa may Mango Avenue Barangay Camputhaw ning dakbayan.

Nunot niini mi-coordinate na sila sa mga intelligence units aron ma- monitor ang maong grupo lakip sa ilang gisusi mao ang mga boarding houses ug lodging houses nga gidudahang maoy pundohan sa grupo.

Gimandoan na usab ang tanang police stations sa pagpaniid sa ilang mga dapit.

Nasayran nga usa ka Roy Quimada nga giingong banggiitang tulisan gikan sa Mindanao maoy nanulis sa Fooda Savers Mart niadtong bulan sa Enero ug nadala ang P100 mil nga kantidad sa mga sensilyo. - Guam Logroño (BANAT NEWS)